ЯҢАЛЫКЛАР

   Яңа ел – иң көтеп алынган бәйрәм. 31 декабрь көнне Югары Шытсу мәдәният хезмәткәрләре китапханәче белән берлектә “Яңа ел сукмаклары буйлап” дигән күңел ачу программасы үткәрделәр. Бәйрәм театральләште-релгән тамаша белән башланып, концерт номерлары һәм конкурслар белән дәвам итте. Чын күңел ачу Кыш бабай, Кар кызы, Яңа ел килгәч башланды. Алар һәркемгә бүләкләр өләштеләр, биюләр, җырлар, уеннар белән бәйрәм чарасын ямьләндерделәр. Бәйрәм җылы, шатлыклы атмосферада үтте. 

29 декабрьдә Югары Шытсу мәдәният йортында “Елмай, бәхет” дигән оттырышсыз лотерея үтте. Бәйрәм мәдәният хезмәткәрләренең Яңа ел котлавы белән башланып китте. Котлау сүзе белән авыл җирлеге башлыгы Мәүлетов Б.М. чыгыш ясады. Лотерея уены җырлар, шигырьләр, биюләр белән аралашып барды. Кичә барышында махсус хәрби операциядәге авылдашыбыз Гомәров Айнурның балаларын да бәйрәм белән котлап, бүләкләр тапшырылды. Тамашачылар да җылы сүзләр, теләкләр әйттеләр, кызыклы биремнәр башкардылар. Бәйрәмнән һәркем бүләкле булып, шат күңел белән таралды. 

Гаилә елы кысаларында “Гаилә көзе” проекты буенча 20 декабрь көнне Югары Шытсу мәдәният йорты хезмәткәрләре “Яшь күңел” фольклор ансамбле әгъзасы Сания апа Хидиятуллинаның 70 яшьлек юбилее уңаеннан “Яшик без дөньяны яратып” дигән портрет – кичә үткәрделәр. Юбилярны авыл җирлеге башлыгы Мәүлетов Б.М., балалар, оныклар, туганнары, авылдашлары котлады. “Яшь күңел” ансамбле үзенең чыгышын бүләк итте, Сания апа да җырга кушылды. Икенче ел инде махсус хәрби операциядәге егетләребезгә җон оекбашлар бәйләүче коллектив та юбилярга үзенең изге теләкләрен җиткерде. Чөнки Сания апа да шушы хатын-кызлар арасында хезмәт куя. Кичә буе юбиляр хөрмәтенә җылы сүзләр, котлаулар, музыкаль номерлар яңгырады. Чара барышында мәдәният хезмәткәрләре яңа бәйрәм – 21 декабрьдә билгеләп үтелә торган Күп балалы гаилә көне белән дә котладылар. Сания апа да күп балалалы гаиләдә үсә, үзе дә күп бала анасы, бер кызының, бер улының гаиләләре дә күп балалы гаилә. Кызганыч, 2006 елда Сания апаның тормыш иптәше мәңгелеккә күчә, Сания апа 5 баланы берүзе аякка бастыра, аның 9 оныгы бар. Балаларына, якыннарына мәхәббәте, авылдашларына хөрмәте һәрвакыт аерылып тора торган сыйфаты булды. Бүген Сания апа авылның абыстае. Кичә ахырында ул үз тормышы, бәхете турында җыр җырлады. Тамашачылар күңелләре тулып тыңладылар. Сания апа тагын бер кат сабыр, көчле рухлы хатын –кыз, әни, әби икәнен раслады. Портрет – кичә җиңел дә, дулкынландыргыч та  булып, бер тында узып китте. Чын күңелдән аралашу, хатирәләр, истәлекләр юбиляр күңелендә озак сакланыр.

Гаилә елы кысаларында 13 декабрьдә Югары Шытсу мәдәният йорты хезмәткәрләре Халыкара чәй көненә “Без бергә бәхетле” дигән ял кичәсе үткәрделәр. Кунакка инде икенче ел рәттән махсус хәрби операциядәге егетләребезгә җыелышып җылы оекбашлар бәйләүче әниләр, әбиләр чакырылган иде. Чара барышында чәйнең килеп чыгу тарихы, бу бәйрәмнең традицияләре белән таныштылар, чәй турында кызыклы фактлар турында сөйләштеләр. Шулай ук кунакларны кызыклы музыкаль дартс көтә иде. Алар “Көйне бел”, “Ретро җырлар” турларын үттеләр. Кичә чәй өстәле артында тәмамланды. Бу гади Чәй көне генә түгел, ә хуш исле чәй  өстәле артында күңелле хатирәләрне искә алып, яхшы кәеф бүләк итүче көн булды. 

Илдә иң зур бәйрәмнәрнең берсе булып Россия Конституциясе көне тора. Бәйрәмнең тантаналыгы зур роль уйный. РФ Конституциясе төп закон буларак карала. Ул төрле җәмгыяти мөнәсәбәтләрне көйләүче булып тора. Хокук документлары Конституциягә буйсына. 11 декабрьдә Югары Шытсу мәдәният йортында китапханә белән берлектә үткән “Конституция – төп закон” түгәрәк өстәле нәкъ шушы турыда сөйләшүдән башланды. Чара барышында балалар “Своя игра” интеллектуаль уенында катнаштылар. Сораулар танып-белү өлкәсенә кагыла иде. Катнашучылар Ватан тарихы буенча кызыклы мәгълүматлар тупладылар. 

  Халыкара коррупция белән көрәш көненә 7 декабрьдә Югары Шытсу мәдәният йорты хезмәткәрләре китапханә белән берлектә “Синең сүзең дә кирәкле” дигән тематик әңгәмә үткәрделәр. Катнашучылар “коррупция” төшенчәсенә аңлатма бирделәр. Презентация карау тагын бер кат тормышта бар әйбер дә акча белән генә үлчәнмәвен, тәрбияле, гадел булып калу өстен икәнен аңлатты. Җанлы әңгәмә коррупциягә каршы көрәш буенча барды. Яшүсмерләр нинди генә көрәштә дә үзеңнән башларга кирәк булуы турында нәтиҗә ясадылар. Чара барышында  катнашучылар стенгазета да чыгардылар.

7 декабрьдә Ватан Геройлары көне уңаеннан Югары Шытсу мәдәният йорты хезмәткәрләре китапханә белән берлектә “Ватан Геройлары” дигән патриотик сәгать үткәрделәр. Чара барышында катнашучылар бу көннең тарихы, Россия Геройлары, аларның батырлыклары турында белделәр. Шулай ук Дан ордены кавалерлары, Советлар Союзы, Социалистик хезмәт Геройлары турында исләренә төшерделәр. Аерым тема булып бүгенге көн геройлары – махсус хәрби операциядә катнашучылар торды. Оештыручылар “Саба таңнары” газетасында басылган “Россия Геройлары – Саба җирендә” дигән мәкалә белән таныштырдылар. Тематик китап күргәзмәсе дә тәкъдим ителде. 

   3 декабрь көнне Инвалидлар ункөнлеге кысаларында Югары Шытсу мәдәният йортында “Без бергә” дигән тематик сәгать үткәрелде. Чарага сәламәтлекләре ягыннан мөмкинлекләре чикле булса да актив тормыш рәвеше алып баручы авылдашлар чакырылды. Алар үзешчән сәнгатьтә дә активлар. Тематик сәгать “Җырлыйк әле” телетапшыруы форматында барды. Катнашучылар көйләр, экрандагы сүзләр буенча җырларны табып, бергәләп җырладылар. Кичә барышында һәркем үзе турында, нинди авырлыкларны җиңәргә туры килгәнен сөйләделәр. Гайфулла абый Мусин үзенең яраткан җырын башкарды. Тематик сәгать бик җылы үтте. 

Һәр кешегә дә иң якын бәйрәмнәрнең берсе – Әниләр көне. Шул уңайдан 29 ноябрь көнне Югары Шытсу мәдәният йорты хезмәткәрләре китапханәче белән берлектә “Әниләр көне – изге бәйрәм” дигән бәйрәм кичәсе үткәрделәр. Быел кичәнең кунаклары уллары махсус операциядә булган аналар һәм “Дубая” халык уен кораллары ансамбленә йөрүче балаларның аналары булдылар. Бәйрәм мәдәният хезмәткәрләренең котлавыннан башланды. Әниләр өчен интеллектуаль уен оештырылды. Әниләр әдәбият, сәнгать, милли гореф-гадәтләр өлкәсендәге биремнәр буенча ярыштылар һәм бик яхшы нәтиҗәләр күрсәттеләр. Тирән хөрмәт, рәхмәт хисләре уллары махсус хәрби операциядә булган аналарга да белдерелде. Һәр әни истәлекле бүләккә лаек булды. Чара барышында үзешчән сәнгатьтә катнашучылар җырлар, шигырьләр, биюләр бүләк иттеләр. Тамашачылар һәр чыгышны җылы каршыладылар. Традиция буенча быел да бәйрәм кичәсе “Кояш гомере телим” җырын күмәк башкару белән тәмамланды. Чара бик җанлы, җылы үтте, чын бәйрәм киче булды.

13 ноябрь көнне Шәмәрдәнмәдәният йортында “Тарихта без эзлебез” Республика шәҗәрә конкурсының район туры үтте. Түбән Шытсу авыл җирлеген 930 кешелек 8 буынны берләштергән Нигъматҗан нәселе тәкъдим итте. Ңюри һәм тамашачылар гаилә ядкәрләре, шәҗәрә агачы, тарихи материаллар, ризыклар, кул эшләре белән таныштылар. Ә сәхнәдә театральләштерелгән күренеш һәм музыкаль номерларда гаилә династияләре, гореф-гадәтләре, эшчәнлекләре, хезмәтләре турында сөйләнде. Гаилә диплом һәм истәлекле бүләкләр белән бүләкләнде.