ЯҢАЛЫКЛАР
Яңа ел балаларның гына түгел, өлкәннәрнең дә яраткан бәйрәме. 9 январь көнне Байлар Сабасының үзәк мәйданында Югары Шытсу, Түбән Шытсу мәдәният йорты, Югары Шытсу китапханәсе хезмәткәрләре “Яңа ел ритмында” дигән күңел ачу программасын кызыклы итеп үткәрергә тырыштылар. Бәйрәм буе җырлар яңгырады, биюләр оештырылды, һәркем уеннарда, конкурсларда катнашты, җиңгән катнашучылар Кыш бабай капчыгыннан баллы күчтәнәчләргә һәм бүләкләргә ия булдылар. Бәйрәм бик күңелле үтте, һәркемгә ошады.
«Татарстанда Кыш» проекты кысаларында 7 январь көнне Югары Шытсу мәдәният йорты хезмәткәрләре китапханәче белән берлектә «Кыш патшалыгында» дигән квест – уен үткәрделәр. Кыш бабай капчыгын эзләп билгеле бер маршрутны үтәргә кирәк иде. Сынаулар барышында балалар кызыксынып барлык биремнәрне дә үтәделәр: табышмаклар чиштеләр, Яңа ел сүзләрен таптылар, кар атышлы уйнадылар, каршылыклар полосасын үттеләр. Һәр катнашучы шәп кәеф һәм бүләкләр белән таралышты.
3 январь көнне Югары Шытсу мәдәният йорты һәм китапханәсе хезмәткәрләре “Могҗизалар вакыты” дигән балалар өчен чыршы бәйрәме үткәрделәр. Бәйрәм театральләштерелгән тамаша белән башланып китте. Яңа ел белән авыл җирлеге башлыгы Мәүлетов Б.М. да котлады. Ә Кыш бабай белән Кар кызы килгәч, балалар шигырьләр сөйләделәр, җырлар, биюләр башкардылар, әйлән – бәйлән ясадылар, “Теләкләр шары”, “Яңа ел флешмобы”, “Йолдызчык” һәм башка уеннар уйнадылар. Әти-әниләр дә читтә калмады. Чара барышында “Әдәби алан” проектында катнашучы балалар да бүләкләнде. Шулай ук махсус хәрби операциядә катнашучы авылдашларыбызның балалары да аерым котланды. Бәйрәмнән һәркем канәгать калып, бүләкләр һәм шәп кәеф белән таралышты.
Кыш көне саф һавада хәрәкәтле уеннар зур шатлык һәм сәламәтлеккә файда китерә. Шушы максат белән 2 январь көнне Югары Шытсу мәдәният йорты хезмәткәрләре китапханәче белән берлектә балалар өчен “Без кышка шат” дигән күңелле стартлар оештырдылар. Программа “Татарстанда кыш” проекты кысаларында үтте. Балалар спорт ярышларында, хәрәкәтле уеннарда катнаштылар. Чарада һәркем Яңа ел бүләге алды.
Яңа ел – иң көтеп алынган бәйрәм. 31 декабрь көнне Югары Шытсу мәдәният хезмәткәрләре китапханәче белән берлектә “Яңа ел сукмаклары буйлап” дигән күңел ачу программасы үткәрделәр. Бәйрәм театральләште-релгән тамаша белән башланып, концерт номерлары һәм конкурслар белән дәвам итте. Чын күңел ачу Кыш бабай, Кар кызы, Яңа ел килгәч башланды. Алар һәркемгә бүләкләр өләштеләр, биюләр, җырлар, уеннар белән бәйрәм чарасын ямьләндерделәр. Бәйрәм җылы, шатлыклы атмосферада үтте.
28 декабрьдә Югары Шытсу мәдәният йортында “Елмай, бәхет” дигән оттырышсыз лотерея үтте. Бәйрәм мәдәният хезмәткәрләренең Яңа ел котлавы белән башланып китте. Котлау сүзе белән авыл җирлеге башлыгы Мәүлетов Б.М. чыгыш ясады һәм җыр бүләк итте. Лотерея уены җырлар, шигырьләр, биюләр белән аралашып барды. Тамашачылар да җылы сүзләр, теләкләр әйттеләр, кызыклы биремнәр башкардылар. Бәйрәмнән һәркем бүләкле булып, шат күңел белән таралды.
10 декабрьдә Югары Шытсу мәдәният йорты хезмәткәрләре Түбән Шытсу төп мәктәбендә «Курайның җырлы чишмәсе» дигән мастер – класс үткәрделәр. Күп кенә балалар курайны беренче тапкыр уйнап карадылар. Катнашучыларга курай уйнаганда сулышның, телнең, бармакларның бер үк вакытта эшләве кирәк икәне аңлатылды. Курайда уйнау алымнары күрсәтелде, балалар белән татар халык көйләре уйналды.
7 декабрьдә Ватан Геройлары көне уңаеннан Югары Шытсу мәдәният йорты хезмәткәрләре “Синең батырлыгың үлемсез” дигән патриотик сәгать үткәрделәр. Чара барышында катнашучылар бу көннең тарихы, Россия Геройлары, аларның батырлыклары турында белделәр. Шулай ук Дан ордены кавалерлары, Советлар Союзы, Социалистик хезмәт Геройлары турында исләренә төшерделәр. Аерым тема булып бүгенге көн геройлары – махсус хәрби операциядә катнашучылар торды. Чара барышында тематик күргәзмә дә тәкъдим ителде.
5 декабрь көнне Мөмкинлекләре чикле булганнар ункөнлеге кысаларында Югары Шытсу мәдәният йорты хезмәткәрләре “Талант һәм ихтыяр көче” дигән мәгълүмат сәгате үткәрделәр. Мөмкинлекләре чикле булган кешеләрнең хәзерге вакытта, элек тә ирешкән уңышлары һәркемгә үрнәк булып торырлык. Аларның тормышы, хезмәте, эшчәнлеге – зур батырлык. Авырлыкларга карамый яшәү, тормышка сөенү, иҗат белән шөгыльләнү өчен үзләрен кулга ала алганнар. Чара шушы турыда сөйләшүдән башланды. Балалар Н.Островскийның “Корыч ничек чыныкты”, Б.Полевойның “Повесть о настоящем человеке”, Ф.Яруллинның “Җилкәннәр җилдә сынала” әсәрләре белән таныштылар. К.Шафикова, Г.Сагиров, Р.Шарипов һәм З.Шаһбанның иҗаты турында искә төшерделәр. Шулай ук мөмкинлекләре чикле булып та, бөтен дөньяга танылган композитор, җырчы, шагыйрь, спортчылар турында презентация тәкъдим ителде.
Хәзерге заманда музыкаль инструментлар дөньясы бик бай. Музыкаль инструментлар төренә, аларның барлыкка килү тарихына кызыксыну уяту, халык көйләрен тыңлауны активлаштыру максатыннан 2 ноябрьдә Югары Шытсу мәдәният йорты хезмәткәрләре “Ал җилкән” мәктәп яны лагерында ял итүче балалар өчен “Музыкаль инструментлар дөньясы” дигән танып-белү сәгате үткәрделәр. Балалар музыкаль инструментлар белән таныштылар, аларның яңгырашын тыңладылар, курайда авазлар чыгарып карадылар, баянга кушылып кашыкларда уйнадылар. Чара файдалы һәм кызыклы үтте.