7 март көнне Иштуган мәдәният йорты белгечләре Халыкара хатын-кызлар көненә багышланган "Март моңнары" концерты үткәрделәр . Бистә үзешчәннәре башкаруында яраткан әниләр, әбиләр һәм барлык хатын-кызлар өчен музыкаль котлаулар яңгырады . Яшь булуларына карамастан, сәхнәдә күңелле һәм дәртле чыгыш ясаучы кечкенә артистлар тамашачыларга зур шатлык китерде . Тамашачылар артистларны алкышлар белән сәламләделәр. Авыл җирлеге башлыгы Д.М. Гайнетдинов котлау сүзләре белән чыгыш ясады. Клуб мөдире контракт буенча армиядә хезмәт итүче егетләрнең әниләрен котлады. Чараның икенче өлешендә " Ягез әле, әбиләр!" конкурсы булды.Конкурста катнашучылар «Иң яхшы хуҗабикә», «Бие әле», «Мәкаль әйт», «Үзем ир-ат» кебек турларда көч сынаштылар. Бөтен бәйрәм хатын-кызларга мәхәббәт белдерү булды, сәхнәдән тормышыбызны җылылык, матурлык һәм кайгыртучанлык белән тутыручыларга рәхмәт сүзләре, котлаулар һәм теләкләр яңгырады. Бүген бәйрәм чарасында булган һәркемгә шатлык, мәхәббәт һәм язгы кәеф бүләк ителде.