ЯҢАЛЫКЛАР
Ел саен бөтен дөньяда ноябрьнең соңгы якшәмбесендә искиткеч бәйрәм-Әниләр көне билгеләп үтелә! Әниләр көне-күңелне нечкәртә торган бәйрәм, ул безнең һәрберебезнең тормышында иң мөһим кеше – әни икәнен искә төшерә. 22 ноябрь көнне Кызыл Мишә мәдәният йортында, мәдәният йорты һәм китапханә хезмәткәрләре " Һәрвакыт булсын әни!»дигән ял кичәсе оештырдылар. Бәйрәм чарасында Тимершык мәдәният йортының сәнгать җитәкчесе дә катнашты. Барлык концерт номерлары мәхәббәт һәм хөрмәт хисләре белән башкарылды. Әниләргә җылы сүзләр, изге теләкләр, күңелгә үтеп керерлек шигырьләр, лирик һәм күңелле җырлар яңгырады.
Кичәне әниләр катнашында «Безнең уен» интеллектуаль уены белән дәвам иттеләр. Уен җылы һәм дустанә атмосферада узды. Әниләр "Ханымнар" һәм "Супер әниләр"командаларына бүленде. Уен берничә турдан торды. Сорауларга җавап биргәндә, анда катнашучылар үзләренең эрудицияләрен һәм логик фикерләүләрен, вакыт чикләнгән шартларда стандарт булмаган ситуациядә карарлар кабул итә белүләрен күрсәтергә тиеш булдылар. Барлык сораулар да катнашучылар өчен кызыклы һәм мавыктыргыч булды. Жюри фикеренчә, әниләр биремнәрне уңышлы үтәделәр һәм дуслык җиңде. Чара ахырында барлык катнашучыларга да истәлекле бүләкләр тапшырылды. Кичәдән һәркем дә кәнәгать калды.
12 июль көнне Кызыл-Мишә мәдәният йорты хезмәткәрләре китапханә белән берлектә Мишә елгасына экскурсия оештыралар. Безнең экскурсиянең төп максаты-елга буенда үскән агачларны һәм үсемлекләрне, табигатьтә сезонлы үзгәрешләрне күзәтү иде. Ләкин күзәтүләр һәм әңгәмәләр барышында башка мөһим сораулар да күтәрелгән. Балалар аның агымын зур кызыксыну белән күзәттеләр, яр буенда үскән агачларны карадылар. Табигатьтә су әйләнеше ничек барганын искә төшердек. Шулай ук балалар: «ни өчен елгаларда су пычрак була? " - дигән темага фикер алыштылар Елга буендагы болында хәрәкәтле уеннар уйнадык. Без вакытны бик күңелле һәм кызыклы үткәрдек. Балалар күп яңалыклар белделәр һәм тагын бер тапкыр су планетадагы иң гаҗәеп матдәләрнең берсе икәненә инандылар, чөнки сусыз җирдә яшәү мөмкин түгел, шуңа күрә суны сакларга кирәк.
29 июньдә Кызыл Мишә мәдәният йорты һәм китапханә хезмәткәрләре балалар өчен платинага , диңгез көненә һәм балык тоту көненә багышланган экскурсия оештырдылар. Башта куркынычсызлык техникасы буенча инструктаж үткәрелде. Балаларга истәлекле датаның барлыкка килү тарихы турында сөйләделәр. .Яшь балыкчылар балык тотып, җир җиләге белән сыйланып рәхәтләнеп ял иттеләр. Оештыручылар балыкчылар арасында конкурс үткәрделәр. Конкурста катнашучыларның барысы да канәгать калды һәм оештыручыларга рәхмәт белдерде. Экскурсиядә катнашучы һәркем татлы призлар алды.
Армиядә хезмәт итү – һәр ир-атның бурычы. Яшь егетләр тормышында иң мөһим вакыйгаларның берсе-армиягә озату. 14 июньдә Кызыл Мишә мәдәният йорты һәм китапханә хезмәткәрләре Илмир Шәйхиевны хәрби Россия Армиясе сафларына озату кичәсен оештырдылар. Залда булачак солдатның туганнары, дуслары, авылдашлары җыелган.Тимершык мәдәният йорты, Кызыл Мишә мәдәният йорты сәнгать җитәкчеләре, Юлбат мәдәният йорты мөдире, район мәдәгият йорты режиссеры Айнур Гәрәев һәм Илмирнең якыннары кичне матур концерт номерлары белән бизәделәр.Тимершык авыл җирлеге башлыгы, Дамир хәзрәт, әти-әниләре, дуслары һәм туганнары үгет-нәсыйхәт һәм теләкләр белән чыгыш ясады. Алар Ильмирга җиңел хезмәт, тугры хезмәттәш дуслар теләделәр. Әлеге чара җылы дуслык шартларында узды. Хәрби хезмәткә чакырылучы барысына да рәхмәт белдерде.
Иң яраткан халык бәйрәмнәре-Сабантуй якынлаша. Борынгы заманнардан бирле бу бәйрәмнең бер өлеше булып бүләкләр җыю саналган. Бүләкләр төрле уеннарда җиңүчеләр өчен җыелган.1 июньдә Кызыл Мишә мәдәният йорты, авыл китапханәсе хезмәткәрләре авыл буйлап сөлгеләр җыю оештырдылар . Гармун, җыр һәм бию белән мәдәният хезмәткәрләре һәм балалар авыл буйлап йөрделәр һәм барысын да традицион бүләкләр җыюда катнашырга чакырдылар. Сабантуйның милли үзенчәлеге шунда ки, майдандагы ярышларда катнашучы һәркем, һичшиксез бүләк алачак. Бүләкләр өчен махсус таләпләр юк. Традицион бүләкләр булып яулыклар һәм матур итеп чигелгән сөлгеләр санала. Җыю барышында җыелган барлык бүләкләр Сабантуй фондына җибәреләчәк.
15 май-Халыкара Гаилә көне. Гаилә - һәрберебез өчен тормышта иң мөһиме.
Халыкара гаилә көнен бәйрәм итү кысаларында Кызыл Мишә мәдәният йортында китапханә белән берлектә "Гаилә, мәхәббәт һәм тугрылык көне"дип исемләнгән ял кичәсе үткәрелде. Анда Шагабиевлар, Валиевлар, Ганиевлар, Гиниятуллиннар, Әүхәдиевлар,Аскаровлар, Биктимеровлар, Гилемшиннар гаиләләре катнашты. Өлкәннәр дә, балалар да конкурс программасында актив катнаштылар. Алар табышмакларга җавап бирделәр, гаилә, дуслык турында җырлар җырладылар, биеделәр, төрле биремнәр үтәделәр. Барлык катнашучылар да күтәренке, яхшы кәеф һәм уңай эмоцияләр алдылар.
26 апрельдә Кызыл Мишә мәдәният йорты һәм китапханә хезмәткәрләре "Тукай килә безгә һәр язда" инеллектуаль уенын үткәрделәр. Габдулла Тукай иҗатына багышланган балалар арасындагы мавыктыргыч ярыш күңелле үтте. Чара барышында катнашучылар бөек шагыйрь турында тирән белемнәрен күрсәттеләр, шулай ук уенны үзләренең музыкаль номерлары һәм шигъри әсәрләре белән бизәделәр. Командалар әсәрләр буенча яхшы белем күрсәттеләр, уен нәтиҗәләре буенча дуслык җиңде!
5 апрельдә Кызыл Мишә мәдәният йорты һәм китапханә хезмәткәрләре Саба мәктәп-интернат укучылары өчен уен программасын үткәрделәр . Клоуннар Клепа һәм Ириска балаларга күңелле уеннар тәкъдим иттеләр. Сихерче үзенең тылсымлы таягы белән төрле кызыклы фокуслар күрсәтте. Чара дәвамында залда балаларның шат авазы яңгырап торды, барысы да канәгать калды! Күңелле клоуннар балаларны дус, игелекле, игътибарлы һәм бер-берсенә кайгыртучан булырга чакырдылар, ә ахырда катнашучыларга татлы сюрпризлар бүләк иттеләр
23 февральдә Кызыл Мишә авыл клубында Ватанны саклаучылар көненә багышланган рус бильярды буенча турнир узды. Бильярд турниры ир-атлар арасында гади ярыш түгел, ул мавыктыргыч уен артында күңелле вакыт үткәрү. Адреналин, дәрт, искиткеч нәтиҗә күрсәтергә теләк бер минут та ял итәргә ирек бирмәде һәм аларны җиңүгә этәрде. Көрәш кызыклы һәм киеренке булды. Ярышларда катнашучыларның барысы да һәр туп өчен көрәшә, интрига соңгы партиягә кадәр саклана. Ә призерлар өчлеге түбәндәгечә бүленде: 1 урынны Нигъматҗянов Фирдинант, 2 урынны Нигъматҗанов Ринат һәм 3 урынны Яруллин Илдар алды.
Без җиңүчеләрне һәм турнирда катнашучыларны котлыйбыз, һәркемгә ярышларда җиңүләр, эштә уңышлар, нык сәламәтлек, хөрмәт һәм мәхәббәт, якыннарыгыз тарафыннан аңлау һәм ярдәм телибез.
21 февраль-Халыкара туган тел көне. Шуның хөрмәтенә Кызыл Мишә мәдәният йорты хезмәткәрләре китапханәче белән берлектә «Телебез матур – бай һәм яңгыравыклы» дигән әдәби кичә үткәрделәр.Туган Тел безнең һәрберебез өчен бик кадерле. Туган телдә без беренче җөмләләребезне сөйлибез һәм иң ачык итеп үз фикерләребезне әйтәбез. Балалар планетада телләрнең күптөрлелеге, аның истәлеге, тарихы турында белделәр. Милли киемнәр, ашамлыклар, бәйрәмнәр ,татар халкының әкиятләре белән таныштылар. Викторина сорауларына җавап бирделәр, тел турында сүз барган мәкальләрне һәм әйтемнәрне искә төшерделәр.Татар халык уеннарын уйнадылар. Соңыннан барсы бергә күмәкләшеп “И туган тел, и матур тел !”җырын башкардылар.