ЯҢАЛЫКЛАР

29 ноябрь көнне Лесхоз мәдәният йортында Татарстан Республикасы Дәүләт флагы көненә багышланган флешмоб булып узды. Флаг яклары нисбәте 1:2 булган турыпочмаклы өч төсле тукымадан гыйбарәт. Флагның яшел төсе язның яшеллеген һәм яңарышны символлаштыра. Шулай ук яшел төс-Ислам төсе. Флаг полотносындагы ак төс чисталыкны, ә кызыл төс өлгергәнлекне, энергияне, көчне һәм тормышны символлаштыра. Мондый чаралар яшьләрне берләштерә, Ватанга мәхәббәт һәм гражданлык җаваплылыгы тәрбияли. Искәртеп узырга кирәк, Татарстан Дәүләт флагы көне кебек даталар бик мөһим. Чөнки Республикабыз якты киләчен төзи алсын өчен, һәркем зур тарихка ия булган үткәнен белергә тиеш.

26 ноябрь көнне Лесхоз мәдәният йортында «Оста куллар» клуб берләшмәсенең «Сөлге чигәм асыл җепләр белән» дип исемләнгән утырышы  узды. Сөлге-халыкның мәдәни кыйммәте. Сөлгеләрдәге бизәкләр эстетик матурлыкка гына түгел, ә тирән мәгънәгә дә ия. Сәнгать җитәкчесе Г.Нәфыйкова осталарны чигү тарихы, төп татар бизәкләре һәм җепләрнең төсләр гаммасы белән таныштырды. Әзер чигелгән сөлгеләргә күзәтү ясалды. Бүгенге дәрестә утырышта катнашучылар алга таба эшләү өчен материал, рәсем һәм схемалар сайлау белән шөгыльләнделәр.

19 ноябрьдә Лесхоз мәдәният йортында "Оста куллар" клуб берләшмәсенең бияләй-тоткычлар тегү буенча йомгаклау утырышы булды. Кулланырга уңайлы бияләй кухняда һәрвакыт кирәк булачак:

Кулларны яндырмас өчен,

Май белән пычратмаска,

Пирогны да мичкә куяр өчен.

Тоткыч ясадык.

Тоткычлар күп булмый. Барлык осталар да үзләренең нәтиҗәләреннән канәгать калдылар!

Шәмәрдән мәдәният йортында "Без тарихта эзлебез"дип исемләнгән Республика шәҗәрә бәйрәменең район этабы узды. Әлеге конкурста Лесхоз мәдәният йорты Сабабаш авыл клубы белән берлектә Мишә авыл җирлегеннән Хасбиевлар гаиләсен тәкъдим итте. Шәҗәрә — чал тарихка тәрәзә. «Әгәр киләчәк буыннар үзеңне искә алсыннар дисәң, игелекле нәсел һәм эчтәлекле китап язып калдыр» - дигән аксакаллар. Хасбиевлар җирлегебездә үз нәселләрен 7 буынга кадәр белүче, гаилә кыйммәтләрен кадерләп, туганлык җепләрен ныгытып яшәүче гаиләләрнең берсе. Әлбәттә, гаилә турында барлык мәгълүматны «Шәҗәрәләр кичәсе»нә сыйдырып бетерү мөмкин түгелдер, шулай да Хасбиевлар чыгышында вакыйгалар агышы алып баручы сүзләрендә генә түгел, экрандагы фотосурәтләрдә дә чагылды, сәхнәдәге чыгышларда да гәүдәләнде һәм үзенең музыкальлелеге белән аерылып торды.

12 ноябрьдә Лесхоз мәдәният йортында осталарыбыз "Оста куллар" клуб берләшмәсе утырышына җыелды. Бүген осталар тоткыч-бияләй тегәргә керештеләр. Гадәти сөлгедән аермалы буларак, ул юанрак, янмый, кулларны пешүдән сакларга ярдәм итә. Лекал буенча тукымадан 20 см га 15 см зурлыктагы турыпочмаклыклар кисеп алынды. Кызлар бик рәхәтләнеп эшкә чумдылар. Эш барышы кызык һәм мавыктыргыч булды.

9 ноябрь көнне Лесхоз мәдәният йортында китапханә белән берлектә Халыкара фашизмга, расизмга һәм антисемитизмга каршы көнгә багышланган «фашизмга юк» дигән мәгълүмат сәгате үткәрелде. Чара барышында балалар фашизм, расизм, антисемитизмның нәрсә икәнен искә төшерделәр, бу фаҗигагә нинди вакыйгалар китергәнен һәм моңа кем гаепле икәнен белделәр. Чара азагында балалар белән төрле милләт, дин, мәдәният һәм социаль төркем кешеләре арасында үзара аңлашу һәм ихтирамның мөһимлеге турында сөйләштеләр.

6 ноябрьдә, Татарстан Республикасы Конституциясе көненә, Лесхоз мәдәният йортында «Мин –Татарстан гражданины» дигән патриотик сәгать үткәрелде. Татарстан Республикасы Конституциясе - аның территориясендә яшәүче халыкларның иң төп кануны. Нәфыйкова Г.И. чарада катнашучыларга законның 1992 елның 6 ноябрендә Югары Советның ХІІ сессиясендә кабул ителүе турында сөйләде, аның структурасы һәм республика гражданнарының төп хокуклары һәм бурычлары белән таныштырды. Чара барышында катнашучылар Татарстан Конституциясе, символикасы, традицияләре һәм мәдәнияте турында белемнәрен ныгыттылар.

6 ноябрьдә, көзге каникулның соңгы көнендә, Лесхоз мәдәният йорты хезмәткәрләре Икшермә авылы балалары өчен «Тылсымлы кыңгырау» туристик маршруты буенча чираттагы экскурсия оештырдылар. Балалар беренче эш итеп Саба урман хуҗалыгы тарихы музеенда булдылар, аннары квест-уеннан соң "Кыңгырау" музеена эләктеләр. Татлы чәй, агач кашыкларга рәсем ясау буенча мастер-класс, мультфильм карау укучыларга ошады. Алар күргәннәреннән бик канәгать калдылар, бик күп кызыклы нәрсәләр ишеттеләр, бик яхшы вакыт үткәрделәр.

5 ноябрьдә Лесхоз мәдәният йортында "Оста куллар" клуб берләшмәсенең чираттагы утырышы булды. Бүген без осталар белән алдагы дәрестә тегә башлаган кухня тоткычы өстендә эшне дәвам иттек. Элементларны тоташтырып, якты тоткычлар килеп чыкты. Нәтиҗә барысын да шатландырды. Эшләнмәнең гади булуына карамастан, үз куллары белән ясалган әйберләр йөрәккә кадерле, чөнки алар безнең кулларның җылысын саклыйлар. Шулай ук бүген якындагы дәресләр темалары да каралды.

5 ноябрь көнне Лесхоз мәдәният йорты хезмәткәрләре Саба гимназиясенең 5 сыйныф укучылары өчен «Тылсымлы кыңгырау» туристик маршруты буенча чираттагы экскурсия оештырдылар. Балалар беренче эш итеп Саба урман хуҗалыгы тарихы музеенда булдылар, аннары квест-уеннан соң "Кыңгырау" музеена эләктеләр. Милли камыр ризыклары белән татлы чәй, агач кашыкларга рәсем ясау буенча мастер-класс, мультфильм карау укучыларга ошады. Алар күргәннәреннән бик канәгать калдылар, бик күп кызыклы нәрсәләр ишеттеләр, бик яхшы вакыт үткәрделәр.