Мастер класс"Әнигә бүләк"

12-13 нче июль көннәрендә Шәмәрдән мәдәният йорты хезмәткәрләре Саба мәдәният йорты белән берлектә Павловка шәһәрендә узган «Поволжская глубинка» Бөтенроссия милли мәдәниятләр фестивалендә катнаштылар. Коллектив татар халкының үзенчәлекле мәдәниятен тәкъдим итте, тамашачыларны матур костюмнары һәм дәртле чыгышлары белән яулады. Артистлар шулай ук Татар Шыналак авылында яшәүчеләрне дә шатландырдылар, алар җирле мәдәният йортында концерт программасы белән чыгыш ясадылар. «Поволжская глубинка» фестивале Россиянең төрле почмакларыннан килгән кунакларны җыйды, аларның һәрберсе үз милләтенең уникаль традицияләрен тәкъдим итте. Саба мәдәният йорты һәм Шәмәрдән мәдәният йорты мәдәни мирасны саклауга һәм популярлаштыруга керткән өлеше өчен Бөтенроссия милли мәдәниятләр фестиваленең югары бүләкләренә лаек булдылар. Фестивальдә катнашу коллектив өчен онытылмаслык тәҗрибә булды, мәдәният арасындагы бәйләнешләрне ныгытуга һәм иҗади идеяләр белән алмашуга ярдәм итте.

Байлар Сабасы «Гаилә» паркында Бигәнәй мәдәният йорты мөдире Фәтхрахманова Дания Гомәр кызы елның матур вакыты - җәйгә багышланган "Күңелле магнитлар" дигән  мастер -класс үткәрде. Җәй  - безгә төрле төстәге чәчәкләр, тәмле сюрпризлар, якты мизгелләр бүләк итә торган гүзәл чор. Балалар рәхәтләнеп режиссер ярдәмчесе Корбанова Рамилә әйткән табышмакларны чиштеләр, уеннарда катнаштылар. Мәдәният йорты мөдире Дания Гомәр кызы  ярдәмендә балалар картина - магнит үрнәкләрен буядылар. Чара балаларга бик  ошады.

            12 нче июль көнне кич җитеп, көтү кайтып,кояш баегач, Олы Арташ халкы капка төбенә борынгыча итеп кич утырырга җыелды. Гасырлар узса да, искерми торган җырлар яңгырады, бала - чагасы, әби- бабае, апа- абыйлар- барсы да гармун моңына кушылдылар. "Курше- фест" фестивале кысаларында үткәрелгән " Капка төбендә кич утыру" исеме астындагы бу күренеш авыл халкына зур бәйрәм булды. Апалар яшьлекләрен искә төшерделәр, кемнәрдер яулык астыннан яшьләрен чылатты. Шулай ук Җиңунең 80 еллыгын истә тотып сугыш чоры җырлары да җырланды. Һәм әлбәттә, бәйрәм балаларның да чыгышларсыз булмады. Алар да саф татарча җырларын башкарып, Сәйдә Г. Тукайның моңлы шигырен сөйләде. Килдебәк мәдәният йорты мөдире ярдәме белән оешкан Бәйрәм искиткеч дәрәҗәдә узып, алга таба бу йоланы дәвам итәрбез дип сүз куештык.

12 июль көнне Иштуган авыл китапханәсе мәдәният йорты белән берлектә «Комплимент - җитди эш» дигән тематик әңгәмә үткәрде. Программа әңгәмә - уен формасында узды, аның максаты үсеп килүче буында кешеләрдә уңай сыйфатларны күрү, моны яхшы һәм ягымлы формада белдерү күнекмәләрен үстерү, «Комплимент» төшенчәсе нәтиҗәле һәм яхшы аралашуга ярдәм итәме һәм ул ялагайланудан нәрсә белән аерыла икәнен аңларга тырышу иде. Син кешеләр белән дус һәм тату яшисеңме? Син һәрвакыт үзеңә якын итә аласыңмы? Моңа ничек ирешергә? Программа барышында без шул хакта сөйләштек тә, конкрет гамәлләр белән төрле биремнәрне үтәп, сүзләрне расладык. Фикер алышу вакытында катнашучылар кагыйдәләргә үз мөнәсәбәтләрен белдерделәр. Программа кызыклы, гыйбрәтле иде. Барысы да үзләре өчен билгеле бер белемнәр алдылар, ниндидер яңа нәрсәләр белделәр, шулай ук күтәренке рух, позитив һәм яхшы кәеф алдылар.