»/«Эхо веков в истории семьи – Тарихта без эзлебез» Республика Шәҗәрә конкурсының зона туры
28 февраль көнне Шәмәрдән мәдәният йортында «Эхо веков в истории семьи – Тарихта без эзлебез» Республика Шәҗәрә конкурсының зона туры узды. Конкурсның максаты-милли мәдәниятне, шәҗәрә традицияләрен торгызу, саклау һәм үстерү, яшь буын вәкилләренә рухи мирас тапшыру. Фестивальдә түбәндәге гаиләләр катнашты: Корсабаш авылыннан Мөбәрәкшиннар гаиләсе, Эзмә авылыннан Җиһаншиннар гаиләсе, Шиңар авылыннан Шәйхетдиновлар гаиләсе. Конкурсны ачу өчен ТР Архив эше буенча дәүләт комитетының архив документларын һәм халыкара элемтәләрне фәнни куллану бүлегенең өлкән белгече Галиева Айсылу Раузит кызы чыгыш ясады. Жюри составында Казан шәһәреннән чакырылган кунаклар бар иде: Белов Владислав Анатольевич -Казан дәүләт мәдәният институтының югары сәнгать мәктәбе факультетының хореография сәнгате кафедрасы доценты, профессор; Фәрхуллина Сөбел Рәис кызы - Казан дәүләт мәдәният институтының музыка сәнгате кафедрасы вәкиле; Якупов Ильяр Марсел улы - Казан дәүләт мәдәният институтының театр сәнгате режиссурасының халык сәнгать мәдәнияте кафедрасы вәкиле. Мәдәният йорты фойесында һәр гаилә күргәзмә оештырды, анда шәҗәрәнең тарихи фактлары күрсәтелде һәм сөйләнелде. Аннары сәхнәдә гаилә командаларының чыгышлары һәм шәҗәрә презентацияләре күрсәтелде. Жюри нәтиҗәләрен чыгарганда, Шәмәрдән мәдәният йорты хезмәткәрләре концерт программасы оештырды. «Эхо веков в истории семьи – тарихта без эзлебез» Республика Шәҗәрә конкурсының зона турында Эзмэ авылыннан Җиһаншиннар гаиләсе җиңү яулады. Конкурс ахырында Саба муниципаль районы мәдәният бүлеге башлыгы Заһидуллин Рөстәм Фидаил улы рәхмәт сүзләре белән чыгыш ясады.